Die voormalige Olimpiese swemmer Geoff Huegill het die jongste Australiese swemmer geword wat buite die swembad in omstredenheid gedompel is, nadat hy aangekla vir die besit van dwelms.

Huegill en sy vrou, Sarah Hills, is met kokaïne in hul besit betrap nadat die polisie Saterdag 'n klopjag by 'n perderesies in Sydney uitgevoer het.

Volgens 'n berig in die Sydney Morning Herald wys kringtelevisiemateriaal hoe die paartjie hulself in 'n badkamer vir gestremdes by dié byeenkoms toesluit.

Die polisie is ontbied om ondersoek in te stel en dit is toe dat 'n "klein hoeveelheid dwelms  gevind is", het die berig gelui.

Die 35-jarige is die jongste hoë profiel-swemmer wat om verkeerde redes die koerantvoorblaaie haal.  

Sy Olimpiese spanmaats Ian Thorpe en Grant Hackett het albei onlangs by rehabilitasie-klinieke om hulp gaan aanklop.