Os beneficios de Samsung poderían caer preto dun 60%

   
  Aínda que a nivel mundial Samsung mantén o seu liderado en
produtos de electrónica de consumo, o pulo económico da compañía non parece ser
capaz de manterse, e nas  previsións
económicas para o terceiro trimestre de 2014  a compañía surcoreana recoñece
unha importante caída de vendas e beneficios, realizando unha estimación de
ingresos de 47 billóns de wons (34.850 millóns de euros) e uns beneficios
operativos de 4,1 billóns de wons (3.040 millóns de euros), cando no mesmo
período de 2013 os ingresos eran de 59.1 billóns de wons e os beneficios de
10,2 billóns de wons. 
Temos así que a propia Samsung recoñece que os seus beneficios caerán un 59,80%
nun ano, o que resulta bastante rechamante se temos en conta que a compañía
está a lanzar actualmente os novos GALAXY Note 4 e incluso a nova familia
GALAXY Alpha (con acabados  premium )
nun momento no que Apple está a bater todas as súas marcas previas de vendas,
aínda que dá a impresión de que o problema de Samsung non é precisamente Apple,
senón a elevada competencia dos fabricantes chineses. De todos os xeitos,
Samsung confía en que os novos lanzamentos destas semanas teñan un impacto
positivo nas súas contas durante o derradeiro trimestre do ano.