D-Link lanza un sistema para evitar que os nosos animais fagan trasnadas na nosa ausencia 

   
  Este sábado 4 outubro,
para quen non o saiba, celebrouse o Día Mundial dos Animais. Para
conmemoralo, o fabricante tecnolóxico D-Link deu a coñecer un
dispositivo especialmente dirixido a todas e todos os que festexaron
a xornada e, ademais, viven en compañía de animais. Falamos do
trebello  EyeOn
Pet Monitor  (DCS-800L/P), un sistema para vixiar dende calquera
recanto no que estamos aos nosos compañeiros mentres estes fican no
fogar. Trátase, en palabras de D-Link, dunha “tecnoloxía sinxela,
económica e sofisticada”, moi acaida para quen queira asegurarse
en todo intre do benestar dos seus animais e, tamén, de que non
estean a facer trasnada algunha.   O sistema EyeOn Pet
Monitor permite que usemos un  smartphone  ou  tablet  para
que, xunto coa aplicación de balde mydlink Lite, teñamos un ollo
posto no noso can ou gato dende calquera lugar. O monitor é
portátil, dispón de conectividade Wi-Fi e inclúe LED
infravermellos para poder ver ao animal tamén na escuridade. Tamén
conta con son bidireccional, polo que se pode ouvir e falar á
mascota mesmo desde fóra de casa. Segundo engade o fabricante, o
sistema resulta “perfecto para aqueles que queiran estar seguros de
que o seu novo amigo está a adaptarse ben á súa contorna, que un
cachorro está san e salvo ou que a acuario se atopa en boas
condicións”. O EyeOn Pet Monitor (DCS-800L/P) estará dispoñíbel
a un prezo de 89,90 euros.