A obra do artista galego Leopoldo Nóvoa sobrevive ao autor na Rede 

   
  Permanecer na memoria
colectiva e non caer no esquecemento é unha tarefa complexa, algo
menos imposíbel dende a aparición das novas tecnoloxías, máis
polo miúdo Internet. Ese caixón de fondo infinito no que hai espazo
para todo e para todos. No caso que nos ocupa, falaremos dun pintor e
escultor galego -Leopoldo Nóvoa- que, malia ter finado hai dous
anos, estrea  páxina web  coa
intención de que a súa obra fique entre nós para sempre. Ese é un
dos milagres da Rede: facer inmortal, desta volta, o legado do
artista nado en Salcedo.   Emporiso, o milagre ten
autoras vivas: a viúva do pintor -Susana Nóvoa- e a comisaria de
arte -Rosario Sarmiento-. Achegándonos un pouco á figura de
Leopoldo Nóvoa, cómpre dicir que é un artista moi completo, cunha
gran carga intelectual e conceptual que, amais, manexaba a técnica e
os medios. Sarmiento recibiu o encargo da viúva do artista, Susana
Nóvoa, para elaborar un web que mantivera a obra e personalidade de
Leopoldo. O resultado,  segundo
reflicte a web do Consello da Cultura Galega , é un elegante  site 
construído a partir da documentación gráfica que permite explorar
a obra de Leopoldo, inicialmente a partir do legado que conserva a
familia pero con aspiracións a ser un catálogo futuro.  A
execución da web levou uns seis meses entre a selección, a
produción dos textos e a execución técnica, sempre tendo en conta
que a páxina debía “reflectir a personalidade de Leopoldo Nóvoa”.
E que podemos atopar neste recuncho? Mostras de obras de diferentes
épocas, retratos realizados por Xurxo Lobato, textos de diferentes
críticos, documentais e reportaxes audiovisuais. Por último,
cómpre lembrar un dato importante que atinxe á obra de Nóvoa, unha
catástrofe acontecida no ano 1979. Instalado desde o ano 1965 en
París, no devandito ano 1979 o seu estudo sofre un incendio e perde
máis de 2.000 obras. Coa apertura desta nova xanela dixital, Nóvoa
pecha a porta a calquera posibilidade de incendio que borre da
memoria a súa obra.