GAIN asesora ás nosas PEME para participaren do financiamento do programa europeo Internet do Futuro

  
   
  Manuel Varela, director de GAIN  
 
 As nosas empresas que
queiran acceder aos financiamentos do programa europeo   Future
Internet Public Private Partnership   (FI-PPP) van ter un
servizo de apoio da man da  Axencia
Galega de Innovación  (GAIN). Como lembraremos, FI-PPP pon a
disposición das PEME e emprendedores 80 millóns de euros para o
desenvolvemento de servizos e produtos TIC ligados á saúde, a
enerxía, o medio ambiente e as Cidades Intelixentes, entre outras
temáticas de orde social e vencelladas claramente á mellora da nosa
calidade de vida e á preservación do medio.   Co fin de facilitar a
nosa concorrencia no programa, GAIN puxo en marcha un servizo de
apoio para o que só teremos que encher un formulario dispoñíbel na
web da axencia, unha enquisa que recolle datos básicos sobre a nosa
actividade e o proxecto susceptíbel de ser presentado ao programa.   Unha vez recibida esta
información, a axencia comprobará que as iniciativas cumpran os
requisitos da convocatoria europea e fará unha selección daquelas
50 con meirande potencial de financiamento. Destes proxectos
seleccionados, farase unha análise das aceleradoras que mellor lle
acaian a cada un deles. Ao fío disto, GAIN lembra que as
convocatorias de fondos artéllanse a través de 16 aceleradoras
seleccionadas na anterior fase da iniciativa e que están
especializadas en distintos sectores. A axencia tamén informa que,
como remate, valorarase de xeito conxunto co solicitante “a
idoneidade da presentación a cada unha das convocatorias posíbeis,
revisándose o proxecto a presentar e/ou dándolle formación para a
súa presentación”.   O programa europeo
 Future Internet Public Private Partnership  (FI-PPP) acubilla
as diferentes liñas de axuda que se están a presentar estes meses e
pon a disposición das PEME e emprendedores 80 millóns de euros para
o desenvolvemento de produtos e servizos innovadores empregando a
tecnoloxía despregada nas anteriores fases do programa (a de agora é
a terceira convocatoria). O programa fornece distintas vertentes
temáticas: eSaúde, enerxía e medio ambiente, Cidades Intelixentes,
etc. A idea, polo tanto é apoiar a competitividade da industria de
desenvolvedores de software e potenciar as ligazóns entre Internet,
servizos innovadores e aplicacións públicas e sociais.