As empresas galegas TIC apostan cada vez máis por cooperar con firmas do exterior

   
  As nosas empresas do
sector tecnolóxico-dixital están a tender pontes firmes coas súas
compañeiras e/ou competidoras de alén das fronteiras. Ademais, as
pontes son cada vez máis amplas e numerosas. Así se reflicte na
 Enquisa ás empresas TIC sobre a Sociedade da Información en
Galicia, Ano 2014,  que se fixo pública esta fin de semana da man
do  Observatorio da Sociedade da
Información e a Modernización de Galicia  (OSIMGA). En termos
máis concretos, dise no informe que o sector TIC galego incrementou
no último ano en máis de 4 puntos a cooperación en actividades de
innovación con empresas da Unión Europea e en máis de dous puntos
a colaboración neste eido con compañías de Estados Unidos.   Porén e malia estas
cifras, os socios principais das nosas empresas seguen a ser
estatais. Así e todo, o número de firmas españolas compañeiras de
viaxe está a descender: no último ano pasouse dun 95,7% a un 90%. A
cooperación coa UE sitúase en arredor dun 15%, e a dos Estados
Unidos nun 6%.   O informe feito por
OSIMGA (organismo adscrito a  AMTEGA ),
tamén reflicte que o número de empresas do tecido
tecnolóxico-dixital galego acadou a cifra de 2.232, “o que sitúa
á Comunidade como a quinta do Estado con maior número de empresas
do sector TIC”. Lembrar que este dá emprego arestora a 15.312
traballadores e mantense por riba dos 15.000 traballadores desde o
ano 2010. Porén, segue a haber moita firma con só dous
traballadores como máximo (o 82,7%).   A investigación tamén
informa que o Valor Engadido Bruto (VEB) do sector superou os 1.087
millóns de euros no ano 2012, o que representou o 2% do PIB de
Galicia e o seu volume de negocio superou os 2.290 millóns de euros
no ano 2013. Segundo informa o observatorio, trátase dunha cifra
lixeiramente superior á do ano 2012 (2.240 millóns de euros).   No que se refire ao
ámbito profesional por xéneros, seguimos a arrastrar uns problemas
que xa veñen de lonxe e que,  tendo
en conta as cifras achegadas recentemente polo CPEIG e a Escola
Técnica Superior de Enxeñaría da USC  (ETSE), non amosan por
desgraza moitas trazas de mellorar a curto ou medio prazo, tendo en
conta que a taxa de mulleres que cursa estudos TIC segue a diminuír.
Isto ten o seu reflexo logo na perspectiva de xéneros, que segundo
indica o estudo de OSIMGA achega unha proporción de homes dun 62,3%
(9.546) fronte ao 37,7% de mulleres (5.765). Ao fío disto e
analizando a distribución de funcións do persoal, constátase unha
clara maioría masculina nas tarefas TIC: 64,3% de homes fronte ao
16,8% de mulleres adicadas a tarefas TIC. Na área de dirección, a
presenza de homes tamén é maioritaria.   A investigación expón
por outra banda que as empresas TIC galegas contan cunha maioría de
profesionais tecnolóxicos con formación universitaria ou
especializada a través de ciclos formativos TIC. Un 44,5% dos
traballadores do sector TIC ten titulación tecnolóxica de grao
superior ou medio e un 26,7% conta con ciclos formativos TIC
superiores ou medios.  No que se refire a
tecnoloxías para accedermos á Rede, a enquisa do observatorio
galego amosa que o ADSL está presente no 60,9% das firmas do sector,
e é polo tanto a tecnoloxía de acceso a Internet máis frecuente,
cun incremento de 4 puntos porcentuais no último ano. “Porén”,
detállase, “destaca o incremento da conexión mediante banda larga
móbil, cunha penetración do 35,8%, o que supón un aumento de 4,5
puntos porcentuais no último ano”.  No que respecta á
velocidade de conexión a Internet, a investigación salienta o
incremento na porcentaxe de empresas que teñen contratadas
velocidades superiores a 100 Mbps (17,4%), o que supón 12,2 puntos
porcentuais máis que o ano 2013, sendo a velocidade de acceso máis
frecuente a que vai de 10 a 30 Mbps (34,5%).  No que atinxe á
computación na nube, estas tecnoloxías xa son empregadas polo 36,1%
das firmas do tecido tecnolóxico-dixital, experimentando
deste xeito un incremento de 3,1 puntos porcentuais respecto á
edición anterior. Asemade, o
70% das empresas TIC galegas realizaron compras de bens ou servizos a
través do comercio electrónico e unha de cada catro empresas TIC
galegas realizou vendas a través de Internet no ano 2013.  As vendas a través de
Internet representan o 37,9% sobre o volume de negocio das empresas
TIC que venden a través da Rede, un incremento de 2,6 puntos
porcentuais respecto ao ano anterior. As empresas TIC venden os seus
produtos ou servizos maioritariamente en Galicia (41,8% das vendas
electrónicas) e no resto de España (41,0%).