O grupo Elogia presenta finalmente a súa nova marca: VIKO

  
   
  Rubén Ferreiro, CEO da nova marca do holding Elogia Group  
 
 Onte  anunciabamos
a celebración dos 15 de anos de Elogia  e de como estaba
prevista, ao abeiro da festa celebrada en Barcelona para conmemoralo,
a presentación da nova marca empresarial do Grupo Elogia. Pois ben,
finalmente aproveitouse a cita entre amigos (e amigos competidores)
para presentar oficialmente  VIKO ,
o novo distintivo da corporación até o de agora coñecida como
Elogia Group. VIKO, informa a empresa, convértese na marca paraugas
para un grupo formado arestora por sete proxectos.  Ou sexa, para os
seguintes proxectos: a axencia de mercadotecnia en liña Elogia; a
axencia de desenvolvemento de aplicacións de mCommerce Moddity; a
axencia de resposta directa Ibrands; a plataforma de envío de
correos Mittum; a ferramenta intelixencia nas aplicacións eMMa; o
software de xestión masiva de páxinas de destino MOÕSE; e o medio
de comunicación Mercadotecnia4eCommerce.net.   
  Segundo nos conta o CEO
do novo selo empresarial, o galego Rubén Ferreiro -presente na
celebración de Barcelona- VIKO naceu para converterse, dende xa, nun
acubillo de máis de 100 profesionais repartidos en tres países:
España (Barcelona, Madrid e Vigo), México (México DF) e Reino
Unido (Londres); e cun volume de negocio superior aos 10 millóns de
euros anuais. Segundo engade Ferreiro, “VIKO é a evolución lóxica
do grupo, a súa madurez e a preparación para un modelo empresarial
no que hoxe somos sete e mañá poderíamos ser 8 ou 10 empresas”.
Tamén explicou a que responde o novo nome (VIKO deriva de  Virtual
Knowledge ) cales son os plans de futuro da nova marca: “Medrar
nas prazas nas que temos presenza e buscar internacionalización
segmentada por tipo de proxecto”.   A
presentación-celebración contou coa asistencia de máis de 200
profesionais da mercadotecnia  online , no que Ferreiro e o seu
equipo cualifican “dunha velada extraordinaria sobre marketing
dixital en Barcelona”. VIKO estará presente xa coa súa nova marca
no eShow Madrid do vindeiro 8 de outubro.