Fallados os premios dos enxeñeiros galegos de Telecomunicación

   
  Temos
xa información cumprida sobre os profesionais, empresas e entidades
recoñecidas este ano polos nos enxeñeiros de Telecomunicación.
Así, o COETG-AETG ( Colexio Oficial e
a Asociación de Enxeñeiros de Telecomunicación de Galicia )
veñen de fallar os Premios Galicia das Telecomunicacións e da
Sociedade da Información 2014, que serán entregados no transcurso
da  XIX
Gala das Telecomunicacións de Galicia , que se celebrará o
vindeiro 24 de outubro, ás 20.00 horas, no Gran Hotel da Toxa, no
concello pontevedrés do Grove. Para comezar, o premio  Gerardo
García Campos  á mellor iniciativa empresarial no sector TIC,
outorgado polo Colexio Oficial e a Asociación de Enxeñeiros de
Telecomunicación de Galicia, foi dar a unha empresa que xunta un
recoñecemento tras outro, Torus
Software Solutions, polo seu “alto grao de innovación, a creación
de emprego, a súa tecnoloxía e a súa aplicación a mercados
amplos”.   O
premio  GRADIANT  á mellor tese doutoral aplicada ao sector TIC
2014 outorgado polo Colexio Oficial e a Asociación de Enxeñeiros de
Telecomunicación de Galicia, recaeu en Francisco
Alberto Varela García, por  Análise
xeoespacial para a caracterización funcional das infraestruturas
viarias en modelos de accesibilidade territorial utilizando sistemas
de información xeográfica .
O xurado valorou “o potencial deste traballo como xerador de
avances na enxeñería civil mediante a aplicación das TIC, e as
súas propostas para o mellor aproveitamento das infraestruturas
viarias, coa implementación de métodos orixinais de análise da súa
funcionalidade, aplicados aos sistemas GIS”. Tamén destacou “a
súa contribución á xeración de novas patentes e iniciativas
empresariais”.  O
premio  INEO  ao produto ou servizo TIC máis innovador de 2014,
outorgado polo Colexio Oficial e a Asociación de Enxeñeiros de
Telecomunicación de Galicia, foille concedido a UTE
Everis-Coremain polo seu proxecto  InnovaSIS,
Sistema integral de xestión de pacientes ,
polo seu “alto grao de innovación, a especial potenciación da
cooperación entre empresas e Administración, o aval de ter superado
un concurso no
competitivo
marco da compra única innovadora e o seu enfoque da xestión
hospitalaria dirixida ao paciente”.  O
premio ao  Mellor Proxecto TIC con Beneficios Sociais  outorgado
polo Colexio Oficial e a Asociación de Enxeñeiros de
Telecomunicación de Galicia, en colaboración con AMTEGA, recaeu en
InfoJC S.L.,
polo proxecto,  Dixesta:
Tecnoloxías innovadoras para a vida saudable.  O
galardón recoñece unha proposta transversal e colaborativa, que
mellora a calidade de vida, diminuíndo a fenda dixital,
e orientada ás necesidades do cliente. O xurado destacou
igualmente “a
súa claridade e a boa presentación”.  O
premio  Acuntia  á empresa galega que aposta polo
desenvolvemento de infraestruturas intelixentes de telecomunicacións,
outorgado polo Colexio Oficial e a Asociación de Enxeñeiros de
Telecomunicación de Galicia, concedéuselle a compañía R, “polo
seu esforzo e dedicación en pechar a fenda dixital en Galicia,
mediante a instalación de redes pioneiras dotadas de equipamento de
última xeración e servizos de gran ancho de banda, que chegan cada
día a máis localidades”. O galardón recoñece tamén “os seus
despregamentos en fibra, cable, SPW e vídeo, dende unha visión
integrada das IIT, que lle están a permitir ofrecer aos seus
clientes un amplo abano de servizos nun tempo récord e por diante
dos seus competidores”.   O
premio  Socio de Honra 2014,  da Asociación de Enxeñeiros de
Telecomunicación de Galicia foi para a Cruz
Vermella de Galicia, polos “seus esforzos permanentes
na renovación das súas infraestruturas tecnolóxicas, das que fai
un uso intelixente na procura dunha maior eficiencia dos seus
servizos”. Segundo fai saber o xurado, o devandito fica demostrado
en iniciativas como a súa plataforma de teleasistencia para persoas
que viven soas, ou polo programa  Agora máis que nunca,  unha
ferramenta web que ten como finalidade axudar aos máis afectados
pola crise. A Asociación tamén valorou os acordos que a Cruz
Vermella ten asinado con diferentes operadores de telefonía e con
destacadas fundacións do terceiro sector para situarse na vangarda
das TIC.  Por
último, o premio  Enxeñeiro do Ano 2014  do Colexio Oficial e
da Asociación de Enxeñeiros de Telecomunicación de Galicia recaeu
en Gil Carlos
Bernárdez Matovelle, pola
súa carreira profesional como enxeñeiro de telecomunicación
en postos de responsabilidade en destacadas empresas en Galicia e
“polo seu alto sentido da profesión, que se traduciu na dedicación
plena á Asociación de Enxeñeiros de Telecomunicación de Galicia,
da que foi socio fundador e presidente”.