Sony anuncia os xogos cos que contarán os usuarios de PS Plus en outubro

   
  Aínda
que nos últimos meses os xogos que recibiron os subscritores de PlayStation
Plus parecían decepcionar a moitos (en boa medida pola calidade á que tiñan
afeito aos xogadores no pasado) en outubro parece que Sony volve ao rego, e  anuncia
os xogos que pasarán a estar dispoñibles dende o vindeiro día 8  sen cargo
adicional para usuarios de PS Plus. 
Por unha banda temos que os usuarios de PlayStation 4 poderán comezar a gozar
dunha edición especial do agardado xogo de condución  DRIVECLUB , que ofrecerá 11 pistas e 10 coches, podendo competir en
liña con até 12 xogadores, experiencia que promete animar a moitos a facerse
coa versión completa deste título. Máis modestos son os xogos  Dust: An Elysian Tail  e  Spelunky , que pese a ser títulos
independentes, prometen moitas horas de diversión para os usuarios de PS4. 
En PlayStation 3 atopamos unha oferta de xogos bastante digna, como  Batman: Arkham Asylum , primeiro título
desta saga, que permitirá introducirse nunha aventura que o ano que vén contará
cun novo capítulo ( Batman: Arkham Knight );
e tamén poderá gozarse dunha auténtica xoia  retro ,
o  hack and slash  de recreativa  Dungeons & Dragons: Chronicles of
Mystara , adaptado á pantalla da PS3 e no que tamén poderemos botar partidas
en liña. 
Máis complicado o ten Sony para nutrir de bos xogos a oferta de PS Plus para a
súa consola portátil, xa que carece de canteira da que tirar, e así este mes os
usuarios de PS Vita teñen que conformarse co arcade  Pix the Cat  e o xogo de rol  Rainbow
Moon , ambos pouco coñecidos polo público.  
		  
   
   Spelunky  é un interesante xogo  indie  que recibirán os usuarios de PS Plus para a PS4 en novembro  
 
 
   
   Dungeons & Dragons: Chronicles of Mystara  poderá gozarse na PS3 sen custo adicional por parte dos subscritores de PS Plus