Investigadores de AtlantTIC, premiados polas súas achegas ás comunicacións por satélite

   
  AtlantTIC, centro de
coñecemento e investigación nas novas tecnoloxías da Universidade
de Vigo,  vén
de obter unha nova e importante distinción ao traballo dos seus
integrantes . Máis polo miúdo, o recoñecemento vén da man do
congreso ASMS/SPSC2014 (dúas conferencias simultáneas do ámbito
internacional centradas nas comunicacións máis avanzadas), onde se
valorou moi positivamente un traballo de investigación realizado por
Alberto Rico, Jesús Arnaú e Carlos Mosquera. Todos eles integrantes
do grupo GPSC de AtlantTIC. Recibiron a distinción  Best Paper
Award  entre 60 achegas presentadas.   Segundo lembran fontes de
AtlantTIC, os autores do traballo (titulado  Balancing Closed and
Open Loop CSI in Mobile Satellite Link Adaptation ) xa recibiran
un premio semellante por unha investigación previa nesta mesma liña.
Foi no congreso de referencia americano sobre comunicacións por
satélite, o  AIAA International Communications Satellite Systems
Conference  celebrado en Canadá en 2012.  A contribución agora
recoñecida salienta por establecer unha metodoloxía para optimizar
a eficiencia da comunicación por satélite, e lévao a cabo mediante
un dispositivo móbil específico. Segundo explica Carlos Mosquera, a
idea é habilitar tecnoloxías precisas para permitir a evolución e
o desenvolvemento das comunicacións por satélite. “Estas”,
sinalou, “van moito máis alá da difusión de canles de
televisión; é o caso, por exemplo, das comunicacións móbiles,
marítimas ou o acceso a Internet”. No congreso, engadiu,
amosáronse propostas para manter o progreso tecnolóxicos en todos
estes ámbitos.   Segundo fai saber
AtlantTIC ASMS/SPSC é o evento de comunicacións por satélite de
referencia en Europa. O evento reúne a expertos da Axencia Espacial
Europea (ESA) e outros socios europeos nas comunicacións avanzadas
por satélite para discutir sobre o futuro destas comunicacións. A
edición pasada foi organizada por AtlantTIC en Baiona (Pontevedra,
Galicia) e a deste ano levouse a cabo en Livorno (Toscana, Italia).  Polo que respecta á
traxectoria dos autores da proposta premiada, sinalar que Carlos
Mosquera leva anos traballando coa Axencia Espacial Europea (ESA) e
publicando neste ámbito, Jesús Arnaú ficou como consultor durante
tres meses na sede da ESA en Noordwijk (Países Baixos) “de onde
saíron interesantes resultados que serviron como motivación para
este traballo”, apuntan fontes de AtlantTIC. Alberto Rico, pola súa
parte, defendeu recentemente a súa tese de doutoramento e acábase
de incorporar a Qualcomm (San Diego, California), “unha das maiores
empresas mundiais de comunicacións móbiles e por satélite”. O
equipo está a preparar unha versión estendida da proposta
recoñecida para unha revista científica do ámbito.