Investigadores da USC salientan en Sarria o imparábel futuro do modelado 3D

   
  A semana pasada celebráronse en Sarria as xornadas
 A conservación do medio natural, tarefa común,  como
o seu propio nome indica dirixidas a amosar recursos humanos e
técnicos para preservar o noso. Entre a listaxe de recursos técnicos
houbo, como era de agardar tendo en conta a cada vez máis frutífera
relación TIC-medio ambiente, recursos tecnolóxico-dixitais. Por
exemplo os amosados polo profesor do Departamento de Enxeñaría
Agroforestal da USC na Escola Politécnica Superior de Lugo, Juan
Ortiz,  quen
expuxo na xornada do venres as vantaxes e virtudes do modelo 3D
mediante fotografía . Ao seu xuízo, esta técnica (creación de
figuras tridimensionais e a escala que reproducen a realidade de
xeito fiel) estase a converter “nunha potente ferramenta de
rexistro de datos tanto entre estudantes como profesores como tamén
profesionais de todo o mundo”.  Na súa opinión, estamos ante unha metodoloxía de
traballo (este modelado 3D mediante fotografía) de gran proxección
para os vindeiros anos, susceptíbel de chegar practicamente a toda a
poboación do planeta, “igual que no seu o día o fixeron a
fotografía e o vídeo”, subliñou Ortiz, quen acudiu acompañado
por Valentín García Souto, enxeñeiro técnico agrícola e
colaborador do grupo de investigación G-I-2114 para a Documentación
en 3D da USC. Xuntos lembraron que os modelos 3D empréganse xa
nunha manchea de eidos nos que resulta necesario dispor de
ferramentas precisas medición. Por exemplo: medicina, veterinaria,
urbanismo, arquitectura, industria (moda, automoción, aeroespacial,
motos, videoxogos, etc.), deportes, conservación do patrimonio ou
accesibilidade. Ao longo das súas sesións, Ortiz e García amosaron
en detalle algúns dos modelos 3D, ortofotos e planos realizados polo
grupo de investigación USCAN3D da Escola Politécnica Superior de
Lugo (USC), responsábel, como recordaremos, do certame  D3Mobile
Metrology League,   o
campionato internacional de modelado 3D de precisión con teléfono
móbil,  do
que falamos recentemente para dar conta de como quedou o palmarés da
súa segunda convocatoria .    Entre os
exemplos de modelos 3D ou ortofotos amosados por Ortiz e García
atopábanse algúns moi vencellados á recuperación do patrimonio de
Sarria, como o caso do  Castro de Formigueiros ou o
Petróglifo da Veiga. Tamén expuxeron outros traballos como os
realizados na Catedral de Santiago de Compostela, a Muralla de Lugo
ou o pavimento de Compostela. Ademais destes labores visualizaron
perante os participantes nas xornadas outras iniciativas de temática
asociada ao rexistro de ensaios en madeira estrutural ou ao modelado
3D do terreo con cámaras a bordo de drons  Dicir para rematar que a cita de Sarria é a segunda
que se celebra dentro das xornadas divulgativas  A conservación do
medio natural, tarefa común,  organizadas pola Universidade de
Santiago de Compostela e patrocinadas por Turismo de Galicia, a
través do programa do VIII Centenario da peregrinación de San
Francisco a Compostela, que se están a desenvolver en 20 concellos
vinculados ó Camiño de Santiago. A vindeira cita será en Lalín, o
vindeiro mércores 1 de outubro, e versará sobre o tema  Mecanización
agraria.