Un proxecto galego participará nunha das grandes citas do emprendemento iberoamericano: Spin2014

   
  Temos presenza galega
entre os proxectos seleccionados nun programa de referencia no ámbito
do impulso a iniciativas innovadoras de mercado xurdidas ao abeiro
das universidades. Falamos do programa Model2Marketm, entre cuxos
proxectos finais atopamos o  relEYEble ,
un sistema que vén da man de investigadores da Universidade de Vigo
e que se orienta a achegar vantaxes ao sector do comercio analizando
o comportamento dos seus clientes en tempo real e mediante sensores.
Como compañeiros de viaxe, relEYEble ten catro iniciativas
procedentes da Universidade Complutense de Madrid ( Creando
Redes ), a Universidade Carlos III de Madrid ( iTrading ),
a Universitat Autònoma de Barcelona ( Knowxel )
e a Universitat Politècnica de València ( Pay
In ). Todos teñen en común o seu compromiso por poñer en valor
a formación, o coñecemento e as tecnoloxías desenvolvidas no seo
das universidades.  Lembrar que Model2Market é
unha palestra-acubillo dirixida a axudar a emprendedores
universitarios a completar o seu chimpo dende o ámbito universitario
ao empresarial, poñendo en xogo “un ambicioso programa de
formación impartido polo IC2 Institute da Universidade de Texas e
premios por valor de máis de 60.000 dólares”, informa
 RedEmprendia , entidade
organizadora en alianza coa Universidade Nacional Autónoma de México
(UNAM), o Instituto Politécnico Nacional (IPN), o Tecnolóxico de
Monterrey, Universia e Banco Santander, a través da súa División
Global Santander Universidades.   Por certo que Model2Market
insírese  no
evento Spin2014 , considerado a gran cita do emprendemento
universitario e que este ano celebrarase en México os días 29 e 30
de outubro. Neste marco, os cinco finalistas estatais compartirán
palestra con outras 15 achegas emprendedoras de Arxentina, Brasil,
Chile, Colombia, México, Perú e Portugal. Ao abeiro do evento,
informa RedEmprendia, beneficiaranse do devandito programa de
formación a medida coordinado polo Instituto Politécnico Nacional e
impartido polo IC2 Institute da University of Texas at Austin. De
xeito paralelo, as propostas de Model2market presentaranse en
Spin2014 perante un xurado composto por autoridades, académicos,
mentores, investidores e emprendedores de éxito de toda
Iberoamérica, amais de competiren polos tres premios do programa,
valorados en máis de 60.000 dólares.   Polo que atinxe ao
proxecto galego, relEYEble, lembrar que se trata dun sistema dirixido
ao comercio ao detalle, axudando aos negocios a ter información
fiábel e útil sobre os gustos e preferencias dos clientes, e todo a
través dun labor de segmentación anónima dos mesmos, por grupos
segundo xénero e idade, ofrecendo datos precisos sobre a atención,
tempos e duración da mirada, a distancia, o estado de ánimo e
outras variábeis prácticas “tanto para o deseño de escaparates e
anuncios, como para adaptar estes en tempo real ao tipo de consumidor
que os observa en cada intre”, informan os seus responsábeis. O
sistema foi creado por un equipo da Universidade de Vigo integrado
por José Luís Alba, Bruno Seoane e Manuel Ubeira, todos eles con
formación en Telecomunicacións, Enxeñaría de Sistemas e
Electrónica.