Die Banting-eetwyse: is jy in vir ’n vet verrassing? Dit voel asof almal die Banting-eetwyse volg, maar waarop is dié leefwyse gegrond, en hoe gaan dit ons liggame ná 30 jaar verander? Dieetkundige Mariza van BeterEet kyk in die kristalbal. Lank, lank gelede – byna 200 000 jaar gelede – was die wêreld in ’n ystydperk, maar aan die suidelike punt van Afrika was daar ’n ander situasie … Tim Noakes verwys na die mense wat in dié koue tyd in die Mosselbaai-omgewing gelewe het. Hulle was anders as die res van die wêreld, want hulle kon oorleef uit die omgewing – daar was ’n oorvloed see- en landdiere, asook ’n verskeidenheid plante, plantknolle en -bolle, blare en seeslaai wat hulle kon eet. Hoekom is dit belangrik? Dit blyk dat dié mense se brein in hierdie tyd drasties vergroot het, en dit as gevolg van die oorvloed vet en proteïene in hul dieet. Hoe lyk dié mense se lewens? Hul lewe bestaan uit kos soek: vis en seekos, jag van diere wat vrylik rondloop, grawe vir bolle en knolle, kinders grootmaak. Hulle is fisiek baie besig en moet gereeld veg of vlug. Hulle slaap wanneer dit donker is en word wakker as dit lig is. Hulle eet alles rou. Hulle word slimmer en kan uiteindelik met vuur na Europa migreer Dít is die storie van die “ Mosselbaai-mense” as ons prof. Curtis Marean se weergawe glo. Die jaar 2014 Hoe lyk mense in 2014 se lewens? Baie minder aktief Ons lewe in warm huise en geboue Ons eet verwerkte kos En wanneer ons die Banting-eetwyse volg, eet ons ekstra vet en vleis, met groente. Maar dit kan ook hardlywigheid veroorsaak. Negatiewe gevolge van Banting in jou liggaam Nitrosamien wat jy kry van al die spek. Dít word verbind met dermkanker. Heterosikliese amiene is gifstowwe wat vorm as vleis “brand”, soos met braaivleis. Omega 6-vet wat in diervette voorkom as diere nie gras en bossies geëet het nie. Dit verhoog inflammasie, asook jou risiko vir diabetes en kanker. Preserveermiddels in die vleis en spek weens massavoorbereiding. Antibiotika, veral in dierprodukte wat nie organies is nie. Hormone kom voor in die vet van diere wat nie wild is nie. Plaagdoders en gifstowwe van die slaai en veral blaargroentes as dit nie organies is nie. Swaarmetale uit die vet van diere, want dis waar hulle dit “stoor”. Die jaar 2040 … Ontmoet vir Jan en San wat in 2014 begin het met die Banting-eetwyse … Jan sit en staar by die venster uit. Hy bly in ’n tehuis. Hy mis sy San vreeslik, maar onthou nie veel van haar laaste jare nie. Hy onthou nie eens van gister en vandag nie… San is jare gelede al oorlede aan ’n beroerte ná al die pille in die wêreld nie haar depressie kon ophef nie. Sy was pragtig maer – het goed gewig verloor met Banting, maar kon dit nooit regkry om van haar “boepmagie” ontslae te raak nie. Wat moes San anders doen? Sy moes baie meer vis en plantolies geëet het en MEER groente, maar ook vleis en vet… Wat moes Jan anders doen? Die toksiene in die omgewing en bymiddels in die VET van die VLEIS, ROOM, EIERS, KAAS en BOTTER waarvoor hy so lief was, het sy brein aangetas. Organiese kos was net te duur en dit was baie makliker om in ’n supermark vir sy kos te “jag” as om dit self voor te berei. Die supermark maak jou ook nie so moeg soos om agter ’n wildsbok aan te hardloop nie. Jan het in elk geval nooit van oefening gehou nie. Hy vat-vat so aan die sakkie onder sy hemp wat nou sy “derm” is … chroniese hardlywigheid het hom ingehaal. Die les As jy baie vet en vleis wil eet, moet jy weet wat jy doen. BeterEet-groete tot volgende keer Mariza van Zyl RD Kliniese Geregistreerde Dieetkundige www.betereet.co.za         Besoek gerus www.betereet.co.za en Facebook/bettereat om elke dag BETER te eet. The post Die Banting-eetwyse: is jy in vir ’n vet verrassing? appeared first on SARIE .